PUBLICACIÓN NO BOE DA ORDE DO MINISTERIO DE SANIDADE COAS CONDICIÓNS PARA A REAPERTURA AO PÚBLICO DAS BIBLIOTECAS NA FASE 1 DO PLAN PARA A TRANSICIÓN CARA A UNHA NOVA NORMALIDADE.
As condicións que afectan á reapertura das Bibliotecas Públicas detállase o capítulo VIII da Orde SND/399/2020, do 9 de maio, para a flexibilización de determinadas restricións de ámbito nacional, establecidas tras a declaración do estado de alarma en aplicación da fase 1 do Plan para a transición cara a unha nova normalidade.
Poderá procederse á apertura das bibliotecas, tanto de titularidade pública como privada para as actividades de préstamo e devolución de obras, lectura en sala, así como para información bibliográfica e bibliotecaria.
Non poderán levar a cabo actividades culturais, actividades de estudo en sala ou de préstamo interbibliotecario, así como calquera outro servizo destinado ao público distinto dos mencionados no parágrafo anterior.
Así mesmo, non se poderá facer uso dos computadores e medios informáticos das bibliotecas destinados para o uso público dos cidadáns, así como de catálogos de acceso público en liña ou catálogos en fichas da biblioteca.
Non obstante o previsto no apartado anterior, na Biblioteca Nacional de España e nas bibliotecas especializadas ou con fondos antigos, únicos, especiais ou excluídos de préstamo domiciliario por calquera motivo, poderase permitir a consulta de publicacións excluídas de préstamo domiciliario con redución de aforo e só nos casos en que se considere necesario.
As obras serán solicitadas polos usuarios e proporcionadas polo persoal da biblioteca.
Unha vez consultadas, depositaranse nun lugar apartado e separadas entre si durante polo menos catorce días.
As coleccións en libre acceso permanecerán pechadas ao público.
A orde detalla tamén as medidas de hixiene e/ou prevención nas bibliotecas no seu artigo 24
Antes da reapertura ao público das bibliotecas, o responsable de cada unha delas deberá adoptar as seguintes medidas en relación coas instalacións:
a) Proceder á limpeza e desinfección das instalacións, mobiliario e equipos de traballo.
b) Nas zonas de acceso e nos puntos de contacto co público, situaranse dispensadores de xeles hidroalcohólicos ou desinfectantes con actividade virucida autorizados e rexistrados polo Ministerio de Sanidade.
c) Instalación de pantallas protectoras, biombos ou paneis de protección cando cumpra. Así mesmo, deberán fixarse marcas no chan para indicar ás persoas que se dirixan aos postos de atención ao público onde teñen que colocarse para respectar a distancia mínima de seguridade.
d) Pechar, panelar, instalar balizas, acordoar ou instalar outros elementos de división para impedir o acceso aos usuarios ás zonas non habilitadas para a circulación dos usuarios.
e) Clausurar os computadores de uso público, catálogos de acceso público en liña e outros catálogos, que só poderá utilizar o persoal da biblioteca.
f) Habilitar un espazo na biblioteca para depositar, durante polo menos catorce días, os documentos devoltos ou manipulados e dispoñer de carros suficientes para o seu traslado.
O responsable de cada unha das bibliotecas deberá organizar o traballo de modo que se garanta que a manipulación de libros e outros materiais realízase polo menor número de traballadores posibles.
O responsable de cada unha das bibliotecas establecerá unha redución do aforo ao trinta por cento para garantir que se cumpren as medidas de distancia social.
Para o desenvolvemento das actividades previstas neste capítulo, as bibliotecas deberán cumprir as seguintes medidas de hixiene e/ou prevención
a) levará a cabo a limpeza e desinfección do centro nos termos previstos no artigo 6.
b) A organización da circulación de persoas e a distribución de espazos deberá modificarse, cando sexa necesario, co obxectivo de garantir a posibilidade de manter as distancias de seguridade interpersoal esixidas en cada momento polo Ministerio de Sanidade.
c) Os lugares de atención ao público dispoñerán de medidas de separación entre os traballadores da biblioteca e os usuarios.
d) Sen prexuízo do disposto no artigo 24.
f), non se desinfectarán os libros e publicacións en papel.
e) Nas zonas de acceso e nos puntos de contacto co público, situaranse dispensadores de xeles hidroalcohólicos ou desinfectantes con actividade virucida autorizados e rexistrados polo Ministerio de Sanidade.
f) No caso de que os visitantes teñan que utilizar os aseos será de aplicación o previsto no artigo 6.5.
En canto ás medidas de información (ART. 25):
Nas dependencias das bibliotecas instalaranse carteis e outros documentos informativos sobre as medidas hixiénicas e sanitarias para o correcto uso dos servizos bibliotecarios.
A información ofrecida deberá ser clara e expoñerse nos lugares máis visibles, como lugares de paso, mostradores e entrada da biblioteca.
